குழந்தைகளுக்கு பிடித்த சேனைக்கிழங்கு குண்டு வறுவல் செய்வது எப்படி?

சேனைக்கிழங்கில் மிகக் குறைந்த அளவே பீட்டா கரோட்டின் மற்றும் கர்போஹைட்ரேட்  அடங்கி உள்ளது. அதனால் இதை யார் வேண்டுமானாலும் சாப்பிடலாம். 

இதில் புரதம், வைட்டமின்கள் மற்றும் கனிமங்கள் ஆகியவை நிறைந்துள்ளன. நார்ச்சத்து நிறைந்து இருப்பதால் மலச்சிக்கலை குறைக்கிறது. 

இரத்ததில் உள்ள சர்க்கரையின் அளவை கட்டுக்குள் வைக்க உதவுகிறது. அதிக அளவிலான விட்டமின் – பி காம்ப்ளக்ஸ் சத்துகளை கொண்டு இருக்கிறது.

இந்த சத்துக்களை கொண்ட சேனைக்கிழங்கில் அருமையான வறுவல் செய்வது எப்படி? என்று பார்ப்போம்.

தேவையானவை:  

சேனைக்கிழங்கு (தோல் நீக்கி, பட்டாணி அளவு துண்டுகளாக நறுக்கியது) - 1 கப், 

உலர்ந்த திராட்சை - 20, 

வேர்க்கடலை - 2 டேபிள் ஸ்பூன், 

அச்சுக் கற்கண்டு - 2 டேபிள் ஸ்பூன், 

முந்திரிப் பருப்பு -  4 (வறுத்துப் பொடியாக நறுக்கியது), 

எண்ணெய் - கால் கப், 

உப்பு - தேவைக்கேற்ப, 

மிளகாய் தூள் - 2 டீஸ்பூன்.

செய்முறை:  

வாணலியில் எண்ணெயைக் காய வைத்து, அதில் சேனைக் கிழங்கைப் போட்டு, நன்கு மொறு மொறுப்பாக வறுத்தெடுத்து, அதில் உப்பு, மிளகாய் தூள் பிசறவும். 

வேர்க்கடலையை எண்ணெயில் வறுத்தெடுக்கவும். பின்னர் முந்திரிப் பருப்பையும் கடைசியாக உலர்ந்த திராட்சையையும் வறுத்தெடுகக்வும். 

பிறகு அச்சுக் கற்கண்டுடன் அனைத்தையும் ஒன்றாகச் சேர்த்துக் கலந்து குலுக்கி விட்டு பரிமாறவும். 

விருந்துகளுக்கு ஏற்ற, விசேஷமான அயிட்டம் இது. சிறு பிள்ளைகள் ரசித்து உண்பார்கள்.