காரசாரமான உணவிற்கு முக்கிய காரணமாய் இருப்பது மிளகாய். நம் இந்திய சமையலில் மிளகாய்க்கு சிறப்பான இடம் உண்டு. இது ஊசி மிளகாய், குண்டு மிளகாய், குடமிளகாய் என மூன்று வகைகளைக் கொண்டது.
இவை காரத்தன்மையால் வேறுபடுகின்றன. குடமிளகாய் காரம் குறைந்தது. இத்தாவரத்தின் காய் சமையலுக்கும், கனிந்த கனிகள் மற்றும் விதைகள் நறுமணப்பொருளாகவும், மருந்தாகவும் பயன்படுகின்றன.
பச்சை மிளகாய் என்றவுடன் பலருக்கு காரம் தான் நினைவுக்கு வரும். பச்சை மிளகாயில் இருக்க கூடிய சத்துக்கள், நன்மைகள் என்ன என்பது பலருக்கும் தெரிய வாய்ப்பில்லை.
காரம் அதிகமாக இருக்கிறது என்பதற்காக சிலர் இதனை ஒதுக்குவதும் உண்டு. இரத்தத்தில் உள்ள சர்க்கரை அளவை சமநிலையில் வைக்க பச்சை மிளகாய் உதவிடும்.
எனவே நீரிழிவு நோயாளிகள் தினமும் உணவில் சேர்த்து கொள்ளலாம். சிவப்பு மிளகாயில் பொட்டாசியம் நிரம்பி இருப்பதால் அது உங்கள் இரத்த அழுத்தத்தினை சரி பார்க்க உதவுகின்றது.
சிவப்பு மிளகாய் உங்கள் நோய் எதிர்ப்பு மண்டலத்தை ஆரோக்கியமாக வைத்திருக்க உதவுகின்றது. நோய்களை எதிர்த்து போராடும் திறனை அதிகரிக்கின்றது. இதய நோய்களை தடுக்கின்றது.
ஆரஞ்சு பழத்தைவிட சிவப்பு மிளகாய் அதிக அளவு வைட்டமின் சி கொண்டுள்ளது. ஒற்றைத் தலைவலி மற்றும் அதனால் ஏற்படும் வலியைக் குறைக்க உதவுகிறது, சளிக்கான அறிகுறிகளைக் குறைகிறது.
சிவப்பு மிளகாயை தொடர்ந்து உட்கொண்டு வருவதால் ஆயுட்காலம் அதிகரிப்பதாக கூறப்படுகிறது. சரி இனி சிவப்பு மிளகாய் கொண்டு செட்டிநாடு மிளகாய் சட்னி செய்வது எப்படி? என்று பார்ப்போம்.
தேவையான பொருட்கள் :
சின்ன வெங்காயம் – 10
பூண்டு – 6 பல்
வர மிளகாய் – 10
தக்காளி – 3
உப்பு – தேவையான அளவு
தாளிக்க :
நல்லெண்ணெய் – 6 தேக்கரண்டி
கடுகு உளுந்து கறிவேப்பிலை
செய்முறை : 
மேலே கூறிய தேவையான பொருட்களை mixi யில் போட்டு பச்சையாக அரைக்கவும்.
பின் கடாயில் எண்ணெய் ஊற்றி தாளிக்க கொடுத்துள்ள வைகளை போட்டு தாளித்து அதில் அரைத்ததை ஊற்றி நன்றாக கொதிக்க விட்டு தேவையான அளவு உப்பு போட்டு கலக்கி இறக்கவும்.
இட்லி, தோசை, சப்பாத்தி, கோதுமை தோசை, ரவா தோசை, ஊத்தப்பம், கார பனியாரம் ஆகிய வற்றிற்கு நன்றாக இருக்கும். 
